Ad Vesperas

V. Deus, in adjutorium meum intende.
R. Domine, ad adjuvandum me festina.
V. Gloria Patri, et Filio, et Spiritui Sancto.
R. Sicut erat in principio, et nunc, et semper et in sæcula sæculorum. Amen. Alleluia.

Antiphona I
Dum esset Rex * in accubitu suo, nardus mea dedit odorem suavitatis.

Psalmus 109
Dixit Dominus Domino meo: * Sede a dextris meis:
Donec ponam inimicos tuos * scabellum pedum tuorum.
Virgam virtutis tuæ emittet Dominus ex Sion: * dominare in medio inimicorum tuorum.
Tecum principium in die virtutis tuæ in splendoribus sanctorum: * ex utero, ante luciferum, genui te.
Juravit Dominus, et non pœnitebit eum: * Tu es sacerdos in æternum secundum ordinem Melchisedech.
Dominus a dextris tuis; * confregit in die iræ suæ reges.
Judicabit in nationibus, implebit ruinas; * conquassabit capita in terra multorum.
De torrente in via bibet; * propterea exaltabit caput.
V. Gloria Patri, et Filio, * et Spiritui Sancto.
R. Sicut erat in principio, et nunc, et semper, * et in sæcula sæculorum. Amen.

Antiphona I
Dum esset Rex in accubitu suo, nardus mea dedit odorem suavitatis.

Antiphona II
Læva ejus * sub capite meo, et dextera illius amplexabitur me.

Psalmus 112
Laudate, pueri, Dominum; * laudate nomen Domini.
Sit nomen Domini benedictum * ex hoc nunc et usque in sæculum.
A solis ortu usque ad occasum * laudabile nomen Domini.
Excelsus super omnes gentes Dominus, * et super cælos gloria ejus.
Quis sicut Dominus Deus noster, qui in altis habitat, * et humilia respicit in cælo et in terra?
Suscitans a terra inopem, * et de stercore erigens pauperem:
Ut collocet eum cum principibus, * cum principibus populi sui.
Qui habitare facit sterilem in domo, * matrem filiorum lætantem.
V. Gloria Patri, et Filio, * et Spiritui Sancto.
R. Sicut erat in principio, et nunc, et semper, * et in sæcula sæculorum. Amen.

Antiphona II
Læva ejus sub capite meo, et dextera illius amplexabitur me.

Antiphona III
Nigra sum, * sed formosa, filiæ Jerusalem; ideo dilexit me Rex, et introduxit me in cubiculum suum.

Psalmus 121
Lætatus sum in his quæ dicta sunt mihi: * In domum Domini ibimus.
Stantes erant pedes nostri * in atriis tuis, Jerusalem.
Jerusalem, quæ ædificatur ut civitas, * cuius participatio ejus in idipsum.
Illuc enim ascenderunt tribus, tribus Domini: * testimonium Israël, ad confitendum nomini Domini.
Quia illic sederunt sedes in judicio, * sedes super domum David.
Rogate quæ ad pacem sunt Jerusalem, * et abundantia diligentibus te.
Fiat pax in virtute tua, * et abundantia in turribus tuis.
Propter fratres meos et proximos meos, * loquebar pacem de te.
Propter domum Domini Dei nostri, * quæsivi bona tibi.
V. Gloria Patri, et Filio, * et Spiritui Sancto.
R. Sicut erat in principio, et nunc, et semper, * et in sæcula sæculorum. Amen.

Antiphona III
Nigra sum, sed formosa, filiæ Jerusalem; ideo dilexit me Rex, et introduxit me in cubiculum suum.

Antiphona IV
Jam hiems transiit, * imber abiit et recessit: surge, amica mea, et veni.

Psalmus 126
Nisi Dominus ædificaverit domum, * in vanum laboraverunt qui ædificant eam.
Nisi Dominus custodierit civitatem, * frustra vigilat qui custodit eam.
Vanum est vobis ante lucem surgere: * surgite postquam sederitis, qui manducatis panem doloris.
Cum dederit dilectis suis somnum, * ecce hæreditas Domini, filii; merces, fructus ventris.
Sicut sagittæ in manu potentis, * ita filii excussorum.
Beatus vir qui implevit desiderium suum ex ipsis: * non confundetur cum loquetur inimicis suis in porta.
V. Gloria Patri, et Filio, * et Spiritui Sancto.
R. Sicut erat in principio, et nunc, et semper, * et in sæcula sæculorum. Amen.

Antiphona IV
Jam hiems transiit, imber abiit et recessit: surge, amica mea, et veni.

Antiphona V
Speciosa * facta es et suavis in deliciis tuis, sancta Dei Genetrix.

Psalmus 147
Lauda, Jerusalem, Dominum; * lauda Deum tuum, Sion.
Quoniam confortavit seras portarum tuarum; * benedixit filiis tuis in te.
Qui posuit fines tuos pacem, * et adipe frumenti satiat te.
Qui emittit eloquium suum terræ: * velociter currit sermo ejus.
Qui dat nivem sicut lanam; * nebulam sicut cinerem spargit.
Mittit crystallum suam sicut buccellas: * ante faciem frigoris ejus quis sustinebit?
Emittet verbum suum, et liquefaciet ea; * flabit spiritus ejus, et fluent aquæ.
Qui annuntiat verbum suum Jacob, * justitias et judicia sua Israël.
Non fecit taliter omni nationi, * et judicia sua non manifestavit eis. Alleluia.
V. Gloria Patri, et Filio, * et Spiritui Sancto.
R. Sicut erat in principio, et nunc, et semper, * et in sæcula sæculorum. Amen.

Antiphona V
Speciosa facta es et suavis in deliciis tuis, sancta Dei Genetrix.

Capitulum Ecclesiasticus 24, 14
Ab initio et ante sæcula creata sum, et usque ad futurum sæculum non desinam, et in habitatione sancta coram ipso ministravi.
R. Deo gratias.

Hymnus
Ave, maris stella,
Dei Mater alma,
Atque semper Virgo,
Felix cæli porta.

Sumens illud Ave
Gabrielis ore,
Funda nos in pace,
Mutans Evæ nomen.

Solve vincla reis,
Profer lumen cæcis,
Mala nostra pelle,
Bona cuncta posce.

Monstra te esse matrem,
Sumat per te preces,
Qui pro nobis natus
Tulit esse tuus.

Virgo singularis,
Inter omnes mitis,
Nos, culpis solutos,
Mites fac et castos.

Vitam præsta puram,
Iter para tutum,
Ut, videntes Jesum,
Semper collætemur.

Sit laus Deo Patri,
Summo Christo decus,
Spiritui Sancto,
Tribus honor unus. Amen.

V. Diffusa est gratia in labiis tuis.
R. Propterea benedixit te Deus in æternum.

Ad Magnificat Antiphona
Beata Mater * et intacta Virgo, gloriosa Regina mundi, intercede pro nobis ad Dominum.

Canticum Beatæ Mariæ Virginis
Magnificat † * anima mea Dominum.
Et exsultavit spiritus meus: * in Deo, salutari meo.
Quia respexit humilitatem ancillæ suæ: * ecce enim ex hoc beatam me dicent omnes generationes.
Quia fecit mihi magna, qui potens est: * {Fit reverentia} et sanctum nomen ejus.
Et misericordia ejus, a progenie in progenies: * timentibus eum.
Fecit potentiam in brachio suo: * dispersit superbos mente cordis sui.
Deposuit potentes de sede: * et exaltavit humiles.
Esurientes implevit bonis: * et divites dimisit inanes.
Suscepit Israël puerum suum: * recordatus misericordiæ suæ.
Sicut locutus est ad patres nostros: * Abraham, et semini ejus in sæcula.
V. Gloria Patri, et Filio, * et Spiritui Sancto.
R. Sicut erat in principio, et nunc, et semper, * et in sæcula sæculorum. Amen.

Ad Magnificat Antiphona
Beata Mater et intacta Virgo, gloriosa Regina mundi, intercede pro nobis ad Dominum.

V. Domine, exaudi orationem meam.
R. Et clamor meus ad te veniat.

Oremus.
Deus, qui salutis æternæ, beatæ Mariæ virginitate fecunda, humano generi præmia præstitisti: tribue, quæsumus; ut ipsam pro nobis intercedere sentiamus, per quam meruimus auctorem vitæ suscipere, Dominum nostrum Jesum Christum Filium tuum: Qui tecum vivit et regnat in unitate Spiritus Sancti, Deus, per omnia sæcula sæculorum.
R. Amen.

V. Domine, exaudi orationem meam.
R. Et clamor meus ad te veniat.

V. Benedicamus Domino.
R. Deo gratias.
V. Fidelium animæ per misericordiam Dei requiescant in pace.
R. Amen.